Íbúar Calgary í Kanada ráku upp stór augu á dögunum þegar kyndugir veggskildir tóku að birtast á garðbekkjum í Bowmont-garðinum, sem liggur í norðvesturhluta borgarinnar.

Á meðal þeirra fleygu staðreynda sem finna mátti voru gullmolar eins og:

Benjy, fyrsti hamstur til að fljúga einflug kringum jörðina, tókst á loft frá þessum depli í Apríl 1937.

Ekkert markvert gerðist hérna — eða það er allavega það sem þau vilja að þú trúir.

Mannkynið fann fyrst upp eld akkúrat hérna árið 1903.

Samkvæmt stefnu yfirvalda í Calgary skilgreindust plattarnir sem veggjakrot og voru því fjarlægðir. Íbúum borgarinnar þótti það miður, enda var þeim stórskemmt og höfðu margir hverjir tekið ástfóstri við uppátækið. Endaði það með því að hópur íbúa beinlínis krafðist þess að fá plattana aftur.

„Sem borgaryfirvöld verðum við að hafa vaðið fyrir neðan okkur,“ sagði í tísti frá borginni skömmu síðar, „en í þessu tilfelli vorum við aðeins of varkár. Hluti af starfi okkar er að hlusta á hvað er Calgarybúum mikilvægt. Ef við getum breytt til hins betra, þá gerum við það.“

Skiltin voru því sett upp aftur og allir glaðir. Borgin tók þó fram að lokum að framvegis væri ágætt ef hinn óþekkti listamaður mætti láta vita ef hann hygðist bæta við heildarsafn verka sinna.

Nágrannaborg Calgary, Edmonton, lét ekki sitt eftir liggja. Gaman verður að sjá hvort fleiri borgir slást í hópinn með tíð og tíma.