Þessi er algjört dúndur, en hún varð til sumarið sem ég gekk í það heilaga og var að velta fyrir mér hvernig fullkomin brúðarterta væri. Þessi kaka sómir sér vel á hvaða brúðkaupsborði sem er, þó lítið verði um brúðkaup í sumar vegna COVID-19. En þessa köku má að sjálfsögðu baka hvenær sem er!

Ég ákvað að baka þessa í ofnskúffu og skera út litlar kökur og dugar uppskriftin í ca 10-12 kökur, allt eftir því hvað þið gerið þær stórar.

Ef þið viljið hins vegar gera 1 stóra köku þá getið þið notað þrjú 20 sentímetra form. Verði ykkur að góðu!

Freyðivínskökur með hindberja- og freyðivínskremi

Hráefni

Botnar:

3 1/3 bolli hveiti
2 1/2 tsk lyftiduft
1/2 tsk salt
285 g mjúkt smjör
1 3/4 bolli sykur
1 1/4 bolli freyðivín
6 eggjahvítur
2 1/2 tsk vanilludropar

Freyðivíns- og hindberjasósa:

250g hindber (fersk eða frosin)
3/4 bolli freyðivín

Krem:

450 g mjúkt smjör
1/2 bolli freyðivíns- og hindberjasósa (sjá hér fyrir ofan)
2 tsk vanilludropar
6 bollar flórsykur
smá salt

Glassúr:

1/4 bolli freyðivíns- og hindberjasósa
1 bolli flórsykur
1/4 tsk vanilludropar

Leiðbeiningar

Botnar:

Hitið ofninn í 180°C og smyrjið form sem þið ætlið að nota. Blandið þurrefnum vel saman í skál og setjið til hliðar. Hrærið smjöri og sykri vel saman í annarri skál. Bætið eggjahvítunum saman við, einni í einu og hrærið vel eftir hverja. Bætið vanilludropunum saman við og hrærið vel. Bætið á víxl þurrefnum og freyðivíni saman við smjörblönduna þar til allt er vel blandað saman. Setjið í form og bakið í 23-25 mínútur. Kælið alveg áður en kremið er sett á.

Freyðivíns- og hindberjasósa:

Setjið hindber í matvinnsluvél og maukið. Hellið blöndunni í gegnum gatasigti til að losna við fræin. Ef þið notið frosin ber þá verður að afþýða þau fyrst. Setjið hindberjamaukið og freyðivín í pott yfir meðalhita og leyfið léttri suðu að koma upp. Hrærið af og til í blöndunni þar til hún er helmingi minni um sig. Takið þá pottinn af hellunni og kælið blönduna.

Krem:

Þeytið smjör og salt saman í 4-5 mínútur. Bætið freyðivíns- og hindberjasósa og vanilludropum saman við og hrærið vel. Bætið því næst flórsykri saman við, einum bolla í einu og hrærið vel saman. Skreytið kökurnar með kreminu eins og ykkur finnst fallegast.

Glassúr:

Blandið öllum hráefnum saman og hellið yfir kökuna/kökurnar. Skreytið með hindberjum.