Með aldrinum hægir á frumuskiptingu og endurnýjun frumna. Innri áhrifaþættir eru erfðir, efnaskipti í frumum eins og hormónaferlið, það spilar margt inn í ytri þætti eins og mengun, of mikil sól eða UV geislar sólarinnar, reykingar, mataræði, lífsstíll ofl.

Við byrjum að sjá aldursbreytingar um 30-40 ára. Það sem gerist er að kollagen framleiðslan í líkamanum minnkar, önnur efni elastin og hyaluronic sýra minnka einnig. Kollagen og elastín eru byggingarprótín og meðal þeirra allra mikilvægustu í bandvefjum líkamans, þar með talið húðinni. Venjulega endurnýjar húðin sig á 28 dögum en með aldrinum lengist sá tími í 40-50 daga og eftir 70 ára aldur þá tekur það húðina / frumurnar 2 mánuði eða meir að endurnýja sig.

Kollagen er nauðsynlegt fyrir stinnleika og fyllingu í húðinni, styður við innra lag húðarinnar. Oftast er kollagen í formi þráða úr peptíðkeðjum sem vefjast hver um aðra og veita þannig styrk og þéttleika,16 mismunandi tegundir af kollagen finnast í líkamanum, sumar eru sterkari en stál. Um 25 ára aldur fer að hægjast á kollagenframleiðslunni og hægist um 1.5% á hverju ári eftir það.

Elastín er nauðsynlegt til að húðin haldi teyjanleika sínum, elastín hefur það hlutverk að halda húðinni þéttri og teygjanlegri. Ef t.d. klipið er í húðina þá kemur í ljós hversu slöpp/þétt hún er, og það fer eftir því hversu fljót húðin er til baka í upphaflega stöðu.

Hyaluronic sýra hjálpar kollageni að halda í teygjanleika og raka þar sem hyaluronic sýran bindur sig við vatn og hjálpar til við að flytja næringu til frumna. Líkaminn framleiðir sjálfur hyaluronic sýru og um 50% sýrunnar í líkamanum tengist húðinni.

Þegar við stundum andlitsæfingarnar þá styðja andlitsvöðvarnir við húðina og lyfta henni ásamt því að blóðflæðið fer á fullt, þar af leiðandi betra súrefnisstreymi til húðarinnar, húðin hreinsast, betra flæði myndast og greiðari aðgangur fyrir næringu til frumna.

Með því að lifa heilbrigðu lífi hvað varðar mataræði, hreyfingu, stunda andlits- og líkamsæfingar og betra val á kremum er hægt að efla kollagenið, elastínið og hyaluronic sýru líkamans og þar með hægja á öldrunarferlinu.