Ég fann þessa uppskrift á matarvefnum Delish og get ekki mælt meira með henni. Ekki skemmir fyrir að það tekur enga stund að útbúa þennan kvöldverð sem er svo gómsætur að það hálfa væri nóg!

Humarsúpa

Hráefni:

4 msk smjör
1 meðalstór laukur, smátt saxaður
2 gulrætur, smátt saxaðar
2 sellerístilkar, smátt saxaðir
salt og pipar
2 hvítlauksgeirar, smátt saxaðir
2 msk tómatpúrra
2 msk hveiti
4 bollar fiskisoð
1 1/4 bolli þurrt hvítvín
1 lárviðarlauf
3 greinar ferskt timjan
1/2 bolli rjómi
450 g humar, eldaður og gróf saxaður
ferskur graslaukur, smátt saxaður

Aðferð:

Bræðið smjörið yfir meðalhita í stórum potti. Setijð lauk, gulrætur og sellerí í pottinn og eldið í um 7 mínútur. Saltið og piprið og hrærið hvítlauk og tómatpúrru saman við. Eldið í um 2 mínútur. Stráið hveiti yfir og eldið í 1 mínútu til viðbótar. Bætið soði og víni saman við sem og lárviðarlaufi og timjan. Lækkið hitann og látið malla í 30 mínútur en hrærið reglulega í blöndunni. Fjarlægið lárviðarlauf og timjangreinar og maukið með töfrasprota. Hrærið rjóma og humar saman við og eldið í um 5 mínútur til viðbótar. Skreytið með graslauk og berið fram.