Hvað þýða svörtu ferningarnir á Instagram?
Svona tekur þú þátt í alþjóðlegri hreyfingu.
Skrifað af Lilju Katrínu Gunnarsdóttur þann
Margir hafa eflaust tekið eftir gnægt af svörtum ferningum á Instagram nú í morgunsárið. Þessir ferningar eru merktir með kassamerkinu #blackouttuesday. Er um að ræða alþjóðlega hreyfingu sem hefur sprottið upp eftir að lögreglumaður þrengdi að hálsi óbreytts borgara, George Floyd, með þeim afleiðingum að hann lést.
Þetta nýjasta dæmi um lögregluofbeldi í garð þeldökkra í Bandaríkjunum hefur valdið miklum usla vestan hafs, eins og hefur líklegast ekki farið framhjá neinum. Nú færir byltingin sig yfir á samfélagsmiðla með fyrrgreindum svörtum ferningum. Þessi einfalda leið til mótmæla á að tjá einingu og stuðning við Black Lives Matter-mótmælin sem hafa verið í gangi um gervöll Bandaríkin síðustu daga.
Það er leikur einn að vera með í mótmælunum. Notendur einfaldlega birta svartan ferning sem mynd á vegg sínum og birta síðan ekki fleiri myndir á miðlinum það sem eftir lifir dags. Með svarta ferningnum mega notendur birta stuðningsskilaboð að eigin vali. Ber dagurinn í dag nafnið Blackout Tuesday, eða Þriðjudagsmyrkvi.
Þessi dagur á uppruna sinn í tónlistarsenunni og hófst með því að nokkrir tónlistarmenn hétu því að gefa ekki út nýtt efni í dag eða birta efni á samfélagsmiðlum.
Þá er fólk einnig hvatt til að sýna samstöðu með því að kaupa ekkert né selja í dag, en tilgangurinn á bak við þessa þögn, sem er ansi ærandi, er að fólk eigi að gefa sér þennan dag til að íhuga hvernig er best að berjast gegn kynþáttafordómum.
