Farþegi í flugi frá Delhi til Bengaluru með indverska flugfélaginu Indigo lenti í heldur óvenjulegu atviki á dögunum þegar barn sem hún bar undir belti ákvað fyrirvaralaust að láta sjá sig ansi löngu fyrir tímann.

Móðirin nýbakaða hafði fengið að fara í flugið vegna þess að hún var ekki komin yfir 32ja vikna markið á meðgöngunni. Barnið, sem reyndist drengur, komst klakklaust í heiminn með dyggri aðstoð flugþjónustufólks sem og kvensjúkdómalæknis, Sailaja Vallabhaneni, sem var fyrir tilviljun stödd um borð.

Flugáhöfnin fékk einróma lof fyrir frábæra samvinnu. „Var í 6E 122 fluginu til BLR, kona fæðir barn í miðju fluginu, undraverð samvinna hjá Indigo flugáhöfninni,“ tísti farþeginn Prabhu Stavarmath til að mynda. „Þau settu upp sjúkraaðstöðu á nokkrum mínútum og svo heyrðist grátur í ungabarni. Dr. Shailaja Vallabhani var til allrar hamingju í þessu flugi! Takk Guð, og öll Indigo-áhöfnin.“

Annar farþegi, Moses Marton, hafði þetta að segja:

Þetta er ekki í fyrsta sinn sem barn fæðist í miðju flugi. Drengur fæddist um borð í flugi í Alaska í ágúst síðastliðnum, og hefur hann fengið nafnið Sky. Í síðasta mánuði þurfti svo egypskt flug frá Kairó til Lundúna að reyna neyðarlendingu þegar farþegi áttaði sig á því að hún væri að fara að fæða. Ekki tókst þó að komast á jörðina tímanlega, þannig að fæðingin átti sér stað um borð, og var sú líka með aðstoð læknis sem fyrir tilviljun var staddur um borð.