Halley, Eta Aquariid
Halley-halastjarnan sem heimsótti okkur fyrri hluta árs 1986 og skildi eftir sig ísagnirnar sem síðan hafa skapað Eta Aquariid-lofsteinadrífuna tvisvar á ári. Mynd frá NASA.

Því miður verður að segja það strax að líkur á að sjá Eta Aquariid-lofsteinadrífuna frá Íslandi eru mjög litlar enda er miðpunktur hennar mjög lágt á lofti frá Íslandi séð eða í aðeins rúmum 5 gráðum yfir sjóndeildarhring í austri. En eftir því sem sunnar dregur á hnettinum aukast líkurnar og eru mestar á suðurhvelinu. Einhverjar bestu ljósmyndir sem náðst hafa af þessari drífu eru t.d. teknar í Pilbara-auðninni í norð-vestur Ástralíu og geta áhugasamir flett þeim upp á netinu.

Besti tíminn til að sjá drífuna er á milli 2 og 3 aðfaranótt 5. maí og er miðpunktur hennar, eða geislapunktur, í nánd við stjörnuna Eta í vatnsberamerkinu og þaðan kemur heiti hennar. Því miður skemmir það fyrir áhugasömum í ár að fullt tungl nálgast sem eykur birtuna og rýrir bestu skilyrði til að upplifa dýrðina. Á móti kemur að vegna ferðatakmarkana og útgöngubanna er mengun í lofti víða með minnsta móti.

Gerist aftur í október

En þótt Íslendingar á Íslandi muni tæplega sjá eina einustu rák drífunnar að þessu sinni er ekki öll von úti um að sjá hana frá landinu síðar meir því Jörðin fer aftur í gegnum slóð Halley 22. október og þá verða skilyrðin hér á landi betri, þ.e. ef það verður ekki skýjað í austri. Hefur beiðni um það verið send Veðurstofunni sem lofar að sjá til þess.

Hér fyrir neðan er stutt fræðslumyndband um Eta Aquariid-drífuna frá You Tube-rásinni The Secrets of the Universe og við viljum einnig benda áhugafólki um lofsteinadrífur og öðrum stjörnugægjurum á að skoða gagnvirka- og rauntíma-loftsteinakortið á vefsíðunni Time and Date.

Forsíðuljósmynd: Fernando Rodrigues / Unsplash