Hvað er mikið Snickers í því? Það er einfalt svar við því: Mjöööög mikið!

Ég elska pönnukökur og get borðað þær í massavís en þessar pönnukökur eru á allt öðru leveli. Ef þú býður í brönsj ættirðu að bjóða upp á þessar í eftirrétt – gestirnir eiga eftir að elska þig að eilífu! Ég lofa!

Uppskriftin er rosalega einföld en ef þú átt uppskrift að amerískum pönnukökum sem þér finnst góð geturðu einfaldlega bætt Snickers-i út í hana. En það góða við þessa uppskrift er að pönnukökurnar eru ekta amerískar – rosalega þykkar og flöffí þannig að ég mæli eindregið með þessari uppskrift.

Njótið!

Snickers-pönnukökur

Pönnukökur:

1 1/2 bolli hveiti
1 msk sykur (má sleppa)
1 tsk lyftiduft
3/4 tsk matarsódi
1 egg
1 1/3 bolli sýrður rjómi
60 g brætt smjör
2 Snickers (söxuð)
olía (til steikingar)

Síróp:

3 Snickers (söxuð)
1/4 bolli rjómi
1/4 bolli hlynssíróp

Aðferð:

Byrjum á pönnukökum. Blandið þurrefnum vel saman í skál og setjið til hliðar. Blandið eggi og sýrðum rjóma vel saman og blandið því saman við þurrefnin ásamt smjörinu. Blandið Snickers-bitunum varlega saman við. Hitið olíu á pönnu og steikið pönnukökurnar yfir meðalhita í nokkrar mínútur á hvorri hlið.

Svo er það sírópið. Setjið Snickers og rjóma í pott og hitið yfir meðalhita þar til allt er bráðið og blandað saman. Takið pottinn af hellunni og bætið sírópinu saman við.