Þann 20. júlí 2020 síðastliðinn sameinuðustu Sólin og Tunglið í fallegu smástirni Pushyan í krabbanum og sköpuðu nýjan farveg á nýju Tungli. Þetta nýja Tungl var í  nákvæmum 180° frá karmískum Satúrnus sem þýðir í stuttu máli að þessi Tunglferð tengir okkur mjög greinilega við dýpsta og kröfuharðasta karmað okkar þetta árið. Þessi Tunglferð – ágúst til september árið 2020 snýst um afar karmísk inntök í öll okkur nánustu sambönd og mannleg tengsli. Satúrnus er hins vegar grundvallandi þema sökum hans afgerandi tengingar við bæði Sól og Tungl og Satúrnus er án efa harðasti kennarinn í lífi okkar allra. Satúrnus kennir okkur auðmýktina, hann kennir okkur fórnir, hann kennir skort og þegar á hólminn er komið fallegustu kærleiksmolana í lífi okkar en hann gerir það í gegnum sársauka, skort og þjáningar. Það kemur því ekki á óvart að Covid-19 ástandið hafi tekið sig upp aftur eins og raun ber vitni og takmarkað þannig allar tengingar og mannleg tengsl á þessum tíma. Næsta Tunglferð mun hins vegar snúast um hreinsun, skipulag, kaflaskipti og kröftugt inngrip yfirvalda. Sú ferð hefst á næsta nýja Tungli og hefst þann 19. september 2020. To Be Continued ..

HRÚTUR

Atvinnumál í uppbyggingu og mótun

Fullt Tungl hjá hrútnum er á miðhimni í dag, sem eru sýnilegustu áhrif kortsins, þetta skapar fullnustu í frama á einhvern hátt en í ár er töluverð uppbygging og nýsköpun í gangi í atvinnumálum hjá hrútnum. Þetta gæti kristallast almennilega í ágúst, svo fylgstu vel með kæri hrútur.

Annars er ágúst nokkuð erfiður mánuður hjá hrútnum. Ný stefna í atvinnulífi mun vera kröfuhörð og einhver útgjöld verða þér íþyngjandi kæri hrútur. Djúpstæður pirringur og möguleg sjálfsafneitun einkennir tilfinningalíf.  Brennandi heit marsorka einkennir sambönd og einhverjir hrútar gætu horfst í augu við sambandsslit. Blessanir eru þó á víð og dreif en sterk aðstoð við þungum útgjöldum gera vart við sig. Einnig kemur inn sterk tenging er við handleiðslu, í gegnum ráðgjafa eða kennara og mun það samband vera til mikillar blessunar til nóvemberloka þessa árs. Stuðningur, annað hvort lagalegur eða annars konar sýnir sig og fer stigvaxandi til nóvemberloka.

 

NAUT

Nautið tjáir sig af reisn og fjölskyldulíf blómstrar – Sameiginleg fjármál taka U-beygju

Nautið nýtur fulls Tungls í húsi sérmenntunar og lagatengdra mála – það kristallast undir þessu Tungli hver stefnan verður í þeim málum næstu tvö árin að minnsta kosti. Karmað næstu tvö árin tengjast sérmenntun, endurmenntun eða tengingu við andlegan kennara. Fullt Tunglið í blessunarríku níunda húsinu færir nautinu hamingjuríkt tilfinningalíf og stuðning frá mikilvægum kennara.

Aðalpláneta nautsins liggur undir fallegum áhrifum Júpiters í ágúst og eftir erfið ár í sameiginlegum fjármálum þá skapast gríðarleg glæsileg U-beygja í þeim efnum. Sálarlíf nautsins blómstarar og allar umbreytingar þessa dagana leiða af sér eitthvað mjög gott.

Félagslíf er af erfiðari toganum til miðs mánaðar. Annað hvort reynast vinir óheiðarlegir eða veita óþægilegan og/eða óviðeigandi stuðning – Bjarnargreiði gæti það kallast á góðri íslensku. Um miðjan mánuðinn verða góð stakkaskipti hjá nautinu eins og flestum merkjum og við það léttast samskiptin við vinina en fjölskyldumál, útlit nautsins og tekjuflæði taka óvænt vinninginn í ágúst.

TVÍBURI

Erfitt karma 2020 sett í forgrunn – Ást, kærleikur og vinátta – Sjálfsvinnu linnir og örlæti tekur keflið

Mótsagnakennd ára einkennir líf tvíburans í dag. Fullt Tunglið lendir í áttunda húsi tvíburans í dag 3. Ágúst. Tunglið í áttunda húsi skapar afar djúpa skynjun, sem að mörgu leyti getur verið truflandi fyrir tilfinningalíf og jafnvægi, sér í lagi þegar Tunglið liggur með Satúrnus sem miðlar sorgum og skort. Þetta skapar tilfinningar skorts, aðskilnaðs og/eða erfiðleika í tengslum við sameiginleg fjármál. Þetta einfaldlega setur erfitt karma ársins 2020- 2021 fyrir tvíburann í forgrunn en það er einfaldlega hinsta kveðjan og aðskilnaður við ástvini. Þetta getur táknar skilnað frá maka eða dauðsfall náins ástvinar. Líklegt er að tvíburinn horfist nú í augu við einhvers konar endalok og hverfulleiki lífsins verði honum ljósari en nokkru sinni fyrr.

Þann 31. Júlí rann þó gyðja ástar og fegurðar inná rísanda tvíburans og ljáði honum ríka þörf til að tjá sig og til að tengjast fólki. Þegar Venus fann sér leið inn á vettvang tvíburans lenti hann á sama ás og Júpiter í sjöunda húsi. Þessar tvær saman á ási rísanda og sambanda færir gríðarlegar blessanir til tvíburans – sérstaklega í formi aðstoðar, handleiðslu, kærleika og nýrra sambanda. Ef þú ert einhleypur tvíburi mun nú ástin banka uppá. Þegar bæði Venus og sjöunda hús blómstra á sama tíma skapast aðstæður fyrir mikla og fallega ást. Þú ennfremur upplifir sjálfan þig verðugan og ferð að laða að þér heilbrigð sambönd sem hafa uppbyggileg áhrif á allt þitt líf. Síðustu mánuðir hafa snúist um uppbyggingu á líkama og heilsu en þessu fer að ljúka og við tekur nýr kafli sem snýr meir að uppbyggingu annara og ferðalaga erlendis til. Hræringar framundan og gætu farið að sýna sig í næsta mánuði en ágúst mun þó fyrst og fremst snúast um kærleikann, nánd og ástina á milli þín og náungans. Ný sambönd sem nú hefjast munu endast tímans tönn og reynast þér vel kæri tvíburi.

KRABBI

Forrysta – Þensla í atvinnumálum – Ný tækifæri

Fullt Tungl í dag þann 3. Ágúst á sér stað í húsi maka og málamiðlunar. Að vera til staðar gæti verið mikilvægt undir þessu Tungli en gæti einnig tengst frama þar sem Sólin situr sterk í fyrsta húsi. Tími Sólar í fyrsta húsi táknar ávallt upphafning status og eflingu innkomu en einnig sterkt frumkvæði, tjáningu og forrystu. Framamál taka oft áhugaverða stefnu þegar Sólin rennur yfir rísandann eins og núna til miðs ágúst.

Árið 2020 hjá krabbanum snýst mikið um örlæti til annarra – þjónustu og gjafmildi. Maki mun þurfa meir en gengur og gerist – gæti hreinlega verið lasinn eða þurft einhvers konar aðhlynningu – andlega eða líkamlega. Krabbinn þarf að leysa úr erfiðum og kröfuhörðum samskiptum og að þjónusta aðra verður í forgrunni. Hluti af þessum samningum gæti verið sameiginlegir sjóðir, fjármál eða kynlíf. Skipti á eignum eða þrotabúi gæti verið ein birtingarmynd þessa lærdóms. Annars er stuðningur til krabbans ríkulegur til miðs ágúst og gæti einnig tengst sameiginlegum sjóðum.

Vinir og félagslíf hafa verið í forgrunni það sem líður af sumri í lífi krabbans, en í ágúst kemur einhver lognmolla í félgslífið og krabbinn sækir kærleikann og vináttu í náttúruna eða í leyndri ást.

LJÓN

Dimmur dalur og sólrisa – Yin og Yang – Ástríkur vinur

Himinn og haf munu einkenna muninn á milli fyrri hluta og seinni hluta ágústmánaðar fyrir ljónið. Fyrri hlutinn mun einkennast aðskilnaði, einangrun, afsölu, missi og útgjöldum en sá seinni af frumkvæði, jákvæðum stuðningi frá föður, yfirvaldi, lögsýslu eða stjórnsýslu. Fyrri hlutinn snýst um orkuleysi og ringulreið en sá seinni um skýra stefnu, jákvætt orkuflæði, kraftmikils stuðnings, skemmtilegra ferðalaga og/eða þekkingarleitar.

Fullt Tunglið í ágúst er eilítið sárt og ljóninu erfitt. Gæti helst einkennst af ágreiningi, þröskuldum, heilsuleysi, skorti og/eða útgjöldum, en vittu til fallega ljón, hjálpin og ljósið er rétt handan við hornið.

Ágúst mun þó allur einkennast af miklum og sjálfslausum kærleika frá vinum og áhrifaríkum einstaklingi – Gæti verið eldri frænka eða mjúkur frændi. Einhver með völd verður til staðar og skapar kærleiksríkan farveg.

Fallega ljónið upplifir sig elskað og verðugt á þessum tíma. Síðustu misseri hafa boðið uppá marga nýja og góða vini en mögulega óvenjulega og mjög áhugaverða. Ágúst verður mánuður þar sem mikill kærleikur birtist í gegnum vini og markmið ljónsins taka á sig áþreifanlegri mynd, sérstaklega eftir miðjan mánuð eldorkan í kortinu fer frá nánast engu yfir í blússandi blóma. Eftir miðjan mánuð getum við séð mikla handleiðslu og yfirvald reynist ljóninu vel.

MEYJA

Kjarninn og heimilið tekur gjöfulum breytingum – Sár skortur á athygli og Ást

Fulla Tunglið í dag 3. Agúst gæti reynst þér erfiður huglega. Þú upplifir þröskulda í karmísku skapandi starfi sem er hluti af þinni stefnu næstu 2 árin. Eins gæti maki virst sýna þér litinn áhuga undir þessu Tungli. Áhugi og athygli gæti vantað og hjartasár hreiðrað um sig. Þetta er þó lærdómur sálarinnar svo hafðu augun á stóru myndinni og mundu að við fáum öll tækifæri til að ganga þennan veg til auka þroska og skilning í hjartans málum.

Fallegir og gjöfulir hlutir eru að gerast í málum heimilis og fasteigna hjá meyjunni,  þó það gæti borið með sér umbreytingarkeim og rót verið á stöðugleika heimilisins. Annað hvort er hún að flytja inní draumahúsið eða að skapa sér draumaheimilið þar sem hún er. Meyjan hefur alltaf ríka þörf til hreiðurgerðar og á nú dásamlegan tíma heima við með uppáhaldsfólkinu sínu.

Þrátt fyrir mjúkt tilfinningalíf þá er hiti og rót í kringum sambönd og hefur verið um nokkra vikna skeið við viðveru Mars í sjöunda húsi. Mars er ávallt tengdur hita og bruna en er sérlega erfið fyrir meyjuna og skapar áflog þar sem hún kemur. Áflogin/átökin gætu tengst sárum leyndarmálum, kynlífi eða sameiginlegum fjármunum. Þessu lýkur um miðjan mánuðinn þegar Mars skapar meyjunni úrlausn þessara mála.

Faðir kemur sterkur inn með stuðning eftir miðjan mánuð, þetta gæti verið peningalegur eða eignatengdur stuðningur.

Fyrir einhleypu meyjuna mun ný ást gera vart við sig á vinnustað, þessi nýja ást gæti verið óvenjuleg, einstaklingur frá annarri menningu eða öðrum uppruna en þú sjálf/ur.

VOG

Heppni í ástarmálum – Stuðningur frá konum – Forrysta í atvinnumálum

Fullt Tunglið í dag sýnir sig á vettvangi þungrar karmavinnu inná heimilinu og í tengslum við móður og tilfinningalíf. Þó þessi dagur gæti verið þér andleg þrekraun verður þessi mánuður þó afar góður.

Kæra vog – Ágústmánuður verður yndislega rómantískur og uppfullur af ást og helguðum stuðningi, aðallega frá konunum í lífi þínu. Með aðalplánetu í því sem fornir vitringar himalayafjallana álitu jákvæðasta hús kortsins, geturðu átt von á sérlega fallegum og hamingjuríkum mánuði. Ást, gleði, rómantík, munaður og forréttindi verða þema þessa mánaðar og ef ekki væri um alheimsfaraldur myndu flestar vogir fara á rómantískt ferðalag undir þessum áhrifum.

Mikil umskipti eiga sér stað um miðjan mánuð hjá voginni einsog hjá mörgum öðrum merkjum en hjá voginni eru þetta jákvæðar breytingar. Ef hiti, erting, húðvandamál, bakflæði eða höfuðverkir hafa hrjáð þig kæra vog í júlímánuði og fyrri hluta ágúst mánaðar, geturðu fagnað því að heilsan mun komast í meira jafnvægi eftir miðjan mánuðinn þegar Mars færir sig. Fyrri hluta ágúst, undir þessum áhrifum, mæli ég með að sleppa öllu sterku, auka við vatnsdrykkju, sleppa tómatsósu, sinnepi, unnum kjötvörum, chili, cayenne, radísum, kaffi, súrsuðum og/eða aukaefnaríkum mat. Ef þú vilt frekari leiðsögn er þér velkomið að prófa að senda á mig á fjola@frettanetid.is

Merkúr er pláneta sem miðlar erlendum áhrifum í korti vogar og verður á ferðalagi um miðhiminn vogarkorts í ágúst – Þetta skapar líkur á ferðalögum, gefur aukna ferðagetu og sveigjanleika. Merkúr er einnig að skapa yogakaraka tengingu með þessari stöðu sinni og færir tækifæri til endurmenntunar eða upphafningu í atvinnumálum í ágústmánuði. Merkúr táknar einnig ræðumennsku, skrif, miðlun og handlagni og gæti miðlað auknum léttleika og meiri samskiptum inní atvinnumál vogarinnar í ágúst.

SPORÐDREKI

Erill og vinnusemi – Maki stígur frá tímabundið – Tekjuflæði í hægri uppsveiflu

Fulla Tunglið í dag 3. ágúst 2020 sýnir sig í kröfuhörðum samskiptum og vinnu sem og  erilsamri orku. Hendur og vinna með hendur og samskipti verður í forgrunni tvö næstu ár og þessi karmavinna mun sýna sig vel í dag undir þessu fulla Tungli.

Árið hefur verið strembið og umhleypingasamt hjá sporðdrekanum en þessum óstöðugleika fer senn að ljúka. Í staðinn munu ný og gróðrasöm viðskiptasambönd birtast á sjóndeildarhringnum (um mánaðarmót sept/okt). Tekjuflæði ætti að hafa aukist síðan síðan um miðjan júlí og ætti að fara stigvaxandi til nóvemberloka. Júpiter er nú að klára sinn lokasprett í bogmanni og mun þá gefa eins og aðeins hann getur gefið. Hann er ekki kallaður “Sá Góði” af fornum vitringum fyrir ekki neitt. Tekjuflæði mun aukast á þessum tíma, neysla á fæðu mun verða mjög heilnæm og útlit þitt geisla eftir því. Tjáning þín og samskipti innan fjölskyldu eru einnig hluti af áþreifanlegum blessunum þessa tíma og mun sýna sig í vaxandi heilun og gagnkvæmum stuðningi til nóvemberloka.

Í miðjan júlí og til og með miðs september muntu sjá áþreifanlegar framfarir í framamálum og verða þær í hámarki allan ágúst.

BOGMAÐUR

Ástin bankar uppá – Lokakafli sorgar en uppskera um miðjan mánuð

Ágúst ber með sér tvískipt áhrif fyrir bogmanninn. Í fyrsta lagi áhrif sem liggja á kortinu til miðs mánaðar og svo áhrif sem liggja á kortinu síðustu tvær vikur mánaðarins. Vissulega er styrkur í kortinu allan mánuðinn, því nú hefur Júpiter (ráðandi pláneta bogmanns) tekið sér stöðu innan bogmannsins og stendur þar vörð um öll hans mál – sér í lagi mál sem varða börnin hans, stuðning, heilsu, útlit og status – og verður þar sterkur til tuttugasta nóvember þessa árs. Eins situr Venus mjög sterkur í húsi sambanda allan ágúst og ef þú elsku bogmaður ert ekki í sambandi mun ástin banka uppá í ágúst. Njóttu og treystu því nú er tíminn til að njóta og elska.

Það er þó einhver bruni í hjartastað fyrri hluta mánaðar – óróleiki, eirðarleysi og mögulega sorg vegna sjálfsmyndar, barna, hugarlífs, innkomuskorts (karma þessa árs) og/eða eignamála.

Sólarstaða er erfið og skapar óheppni, þröskulda, varnarleysi og möguleg veikindi til miðs mánaðar en eftir miðjan mánuðinn færa sig bæði Mars og Sól, orku og framkvæmdapláneturnar báðar og það á kraftmeiri stað sem skapar mjög jákvæða og áþreifanlega framvindu fyrir bogmanninn. Ef líðan, staðan þín og framvinda einkennast af stöðnun og vanlíðan fyrri hluta ágúst, skaltu aðeins anda, fara inná við og hafa þig hægan, því eftir miðjan mánuð muntu sjá heppni, mikla uppskeru og meðbyr á nánast öllum sviðum. Bogmannskortið verður í heild sinni afar sterkt og meðbyr ætti að sýna sig á mikinn og margvíslegan máta.

STEINGEIT

Árleg hreinsun steingeitar – Varnarleysi í skoðun

Fullt Tungl í dag 3. Ágúst er innan steingeitarinnar sjálfrar. Tunglið miðlar steingeitinni karmískum áhrifum þessa árs, eða lærdómi sálarinnar þetta árið, og þar með þungum ábyrgðum og stífri sjálfsuppbyggingu. Þó þessi nýja uppbygging sé stíf og kröfuhörð er hún kærkomin breyting eftir nokkkra ára niðurrif.

Sólin skapar ávallt áhugaverð áhrif í korti – en hitinn sem frá henni stafar á það til að skapa bruna, valdatog eða ertingu. Þetta er sérstaklega raunin fyrir steingeitina þar sem Sólin ræður yfir húsi umbreytinga og varnarleysis. Ferð Sólar í gegnum merkin tólf táknar ávallt ferð varnarleysis og sálrænnar skoðunar – Þetta er hluti af karmísku lífshlaupi geitarinnar. Í byrjun ágúst er þetta varnarleysi á sviði sambanda, og sér í lagi í tengslum við yfirvald, föður, stjórnsýslu eða eigin líkama, en um miðjan mánuð fer Sólin í eigið hús og þá koma raunverulegar og haldbærar breytingar á líkama og atvinnu. Á ári hverju er þetta tími þar sem steingeit rísandi þarf að pakka saman einhverju gömlu og opna fyrir eitthvað nýtt. Upphaflega getur þetta haft í för með sér sársauka en viska og styrkur steingeitarinnar er mikill og eru hennar bestu vinir á slíkum stundum.

Samskiptin hafa verið heit og óþægileg, sér í lagi samskipti innan fjölskyldunnar en þetta á líka að sjatna um miðjan mánuð.

VATNSBERI

Ástin og Hamingja í forgrunni – Samskipti við kraftmikla einstaklinga eða yfirvald

Árið 2020 er tími óvæntra og ófyrirsjáanlegra útgjalda í lífi vatnsberans og ættu að verða mjög áberandi í ágúst mánuði, sérstaklega undir fullu Tungli þennan ágústmánuð. Sem betur fer er akkurat bjartasta húsið einnig hús tekna, samvinnu við vini og hópa og uppfylltar draumsýnir og langtíma markmið. Leyfðu þér að reyna við þína langsóttustu og mikilvægustu drauma því þetta er haustið þar sem draumar eru að rætast í korti vatnsberans – þessi tími er hafin er nær hámarki 13. September 2020 þegar Júpiter tekur stoppið sitt.

Eins og hjá hinum merkjunum verður fyrri hluti ágúst afar ólíkur seinni hluta ágúst en sá fyrri lýtur að vinnu, tekjuöflun og afköstum hjá vatnsberanum en sá seinni að fólki, tengingum og kraftmiklum samskiptum. Nýtt samband, annað hvort vinnu eða ástarsamband gæti bankað uppá. Seinni hluta ágúst og byrjun september verður yfirvald, stjórnsýsla, föðurmynd í sterku hlutverki í lífi þínu kæri vatnsberi og gæti skapað þér tækifæri. Samskipti gætu verið eilítið strembin, en hamingja, sköpun, börn, rómantík verður í forgrunni allan mánuðinn.

FISKUR

Þensla í atvinnumálum – Markmiðastarf í fullri mótun og sýnir sig í ágúst

Fulla Tunglið í dag 3 ágúst 2020 er uppbyggjandi fyrir fallega mjúka fiskinn eins og í raun allar plánetustöður árið 2020. 2020 er ár fisksins. Hinn þungi karmíski Satúrnus tekur sér stöðu á stað þar sem hann hreinlega getur ekki gert neitt af sér, en í staðinn skapar markvissa markmiðatengda vinnu, mannúðarlegan blæ, áreiðanlega vini og mögulega kröfuhart hópastarf að sameiginlegu markmiði. Þetta er árið þar sem fiskurinn spyr sig: Hvað er það sem ég vil fá frá þessu lífi og vinnur af sjálfsleysi í átt að þessu markmiði.

Markmiðastarf fisksins – það er að segja – vinna hans til hans æðstu markmiða og drauma birtist honum ljóslifandi undir þessu fulla Tungli og þó það gæti litið út sem markmiðin virðist langsótt og þrekfarin þá er þungi þeirrar tengingar á milli Satúrnusar og Tungls sem á sér stað í dag.

Mikill vöxtur verður í atvinnumálum frá og með ágúst til nóvember loka. Rót er þó að hlutverki fisksins og í raun öllu hans starfi en þetta verður eingöngu af hinu góða þegar á hólminn er komið. Á þessum tíma frá ágúst til nóvember gæti atvinnulíf tengst meiri vinnu með peninga, fjárfesta, útgáfu eða annað sem stuðlar að heilbrigðri þenslu orðstýrs og frama. Tilfininngalíf fisksins hefur verið erfitt síðustu 3 misseri en þessu er að líða undir lok og skýr og skapandi stefna mun birtast þér um mánaðarmót sept/okt, sem og tilfinningalegt jafnvægi sem verður þér mikill léttir elsku fiskur.