Ég hef haft aðeins meiri tíma en vanalega til að leika mér í eldhúsinu eftir að ég ákvað að hætta í vinnunni minni. Mjög gáfulegt, ég veit.

Í þessum eldhúsleik hefur ýmislegt fæðst – bæði hefðbundið og óhefðbundið. Þessar bollakökur eru meðal þess hefðbundna en þær eru gjörsamlega ómótstæðilegar þó þær láti lítið fyrir sér fara.

Ef þið elskið súkkulaði og hnetusmjör þá eru þetta kökurnar fyrir ykkur!

Súkkulaðikökur með hnetusmjörskremi

Kökur:

3 egg
2 bollar hveiti
1 bolli púðursykur
1/2 bolli kakó
1/4 bolli ólífuolía
3/4 bolli jógúrt (eða sýrður rjómi)
150 ml sjóðandi heitt vatn
1/2 tsk matarsódi
1 tsk lyftiduft
1 tsk vanilludropar

Krem:

115 g mjúkt smjör
150 g mjúkur rjómaostur
160 g mjúkt hnetusmjör
2 bollar flórsykur
2 tsk vanilludropar

Hnetur:

1 bolli pekanhnetur
1/4 bolli sykur
1 msk smjör
1/4 tsk kanill (má sleppa)

Aðferð:

Byrjum á kökunum. Hitið ofninn í 180°C og takið til 12-14 möffinsform. Blandið hveiti, púðursykri, kakó, matarsóda og lyftidufti vel saman í skál. Bætið eggjum saman við, einu í einu og því næst olíu og jógúrti. Blandið vatninu varlega saman við þar til allt er blandað saman og loks er vanilludropum blandað saman við. Deilið deiginu á milli formanna og bakið í 20 mínútur. Leyfið kökunum að kólna áður en kremið fer á.

Svo er það kremið. Þeytið smjör og rjómaost mjög vel saman þar til blandan er létt og ljós. Blandið síðan hnetusmjörinu vel saman við þar til blandan er kekkjalaus. Loks er flórsykri og vanilludropum bætt saman við og kökurnar skreyttar.

Loks hneturnar. Hitið pönnu yfir meðalhita og setjið öll hráefnin á pönnuna. Hrærið stanslaust í blöndunni í um 5 mínútur, eða þar til allur sykur hefur bráðnað og hneturnar huldar í blöndunni. Þá er blöndunni skutlað á smjörpappírsklæddan flöt eða bakka og gaffall notaður til að aðskilja þær. Þær eru síðan látnar kólna, saxaðar í bita og notaðar til að skreya bollakökurnar.