„ÍBV mun ekki standa fyrir einum einasta viðburði um Verslunarmannahelgina, hvort um sé að ræða dansleiki, tónleika, brennu, brekkusöng eða hvað eina. Með þessu viljum við sýna fulla ábyrgð og taka af allan vafa um að ÍBV muni standa fyrir viðburði sem kynni að storka fjöldatakmörkunum.“ Þetta kemur fram í yfirlýsingu Þjóðhátíðarnefndar sem birt var fyrir stundu.

Þjóðhátíð er gríðarlega mikilvæg fjáröflun fyrir barna- og unglingastarf ÍBV og er ein ástæða þess að félagið getur haldið úti jafn öflugu starfi í litlu samfélagi og raun ber vitni. Á vordögum fór af stað átak hjá nokkrum Eyjamönnum sem keyptu miða og skoruðu á aðra að gera slíkt hið sama, hvort sem Þjóðhátíð yrði haldin eða ekki og styrkja þannig ÍBV ef engin yrði hátíðin. Ef fólk kýs að fá miðann sinn ekki endurgreiddan er slíkur stuðningur gríðarlega vel þeginn á þessum erfiðu tímum í rekstri barna- og unglingastarfs og ljóst að slíkur stuðningur hvetur okkur áfram til góðra verka. Einnig verður áfram í boði að kaupa miða á Þjóðhátíð 2020 fyrir þá sem vilja styrkja félagið. Þetta kemur fram í yfirlýsingu frá Þjóðhátíðarnefnd.

Þjóðhátíðarlag 2020
Á föstudaginn mun Þjóðhátíðarlagið 2020 verða frumflutt í Brennslunni á FM957. Höfundar lags og texta eru bræðurnir Ingólfur og Guðmundur Þórarinssynir en Ingó hefur glætt Þjóðhátíð lífi síðustu ár eins og landsmenn þekkja. Lagið heitir Takk fyrir mig. Bræðurnir og Þjóðhátíðarnefnd voru algerlega sammála um að gefa út lagið þrátt fyrir þessi örlög.

Endurgreiðsla miða
Vinna við endurgreiðslukerfi er í fullum gangi og verður vel kynnt þegar endurgreiðslur munu hefjast, í síðasta lagi í lok þessa mánaðar. Fólk mun standa frammi fyrir þremur kostum; a) Að fá miðan endurgreiddann, b) að styrkja ÍBV um andvirði miðans, og c) að flytja miðann yfir á Þjóðhátíð 2021.

Þjóðhátíð 2021
Nú þegar er undirbúningur hafinn fyrir Þjóðhátíð 2021. Þeir sem keypt hafa miða á Þjóðhátíð 2020 mun gefast kostur á að flytja miðann á næsta ár, enda ljóst að miðaverð á Þjóðhátíð 2021 mun verða hærra en í ár.

Hér má sjá yfirlýsinguna frá Þjóðhátíðarnefndar