Leynihráefnið gerir þessa köku ómótstæðilega
Fátt betra en góð súkkulaðibrúnka.


Mér finnst fátt betra en góð brúnka. Og einn helsti kostur við brúnkur er hvað þær eru ofureinfaldar og hægt að henda í þær með litlum fyrirvara þegar að gesti ber að garði.
Ég baka allavega mjög oft brúnkur því það eru svo fá hráefni í þeim og ég á þau yfirleitt öll til heima þannig að ég þarf ekki einu sinni að fara út í búð. Svo er hægt að poppa brúnkur upp með alls konar og þá er um að gera að leyfa ímyndunaraflinu að leika lausum hala.
Kaffið er hetjan í þessari brúnku en ég poppaði hana upp með smá karamellusósu sem má alveg sleppa. Þetta gerist ekki einfaldara!
Kaffi- og karamellubrúnkur
Hráefni:
115 g smjör
230 g dökkt súkkulaði (grófsaxað)
3/4 bolli sykur
3 stór egg
1 tsk vanilludropar
4 msk kalt, sterkt kaffi
3/4 bolli hveiti
2 msk kakó
1/4 tsk salt
1/4 bolli karamellusósa (má sleppa)
Aðferð:
Hitið ofninn í 180°C og smyrjið form sem er 20×20 cm stórt. Bræðið smjör og súkkulaði saman, í potti eða örbylgjuofni, og leyfið blöndunni að kólna. Blandið sykri saman við súkkulaðiblönduna og hrærið vel. Bætið síðan eggjunum saman við, einu í einu, og síðan vanilludropum og kaffinu. Blandið hveiti, kakói og salti varlega saman við þar til allt er blandað vel saman en passið að blanda ekki of mikið. Hellið deiginu í formið og breiðið úr því. Hellið karamellusósuna yfir ef þið notið hana. Bakið í 30-35 mínútur og leyfið kökunni að kólna aðeins áður en þið skerið hana í bita.
You must be logged in to post a comment.