Ostakakan sem gerir þig orðlausan
Þarf alltaf að vera kaka?


Hvað getur verið betra en silkimjúk ostakaka, trufluð karamellusósa og æðislegt möndlukurl? Bara voðalega fátt.
Til að gera uppskriftina sem auðveldasta keypti ég einhverja gourmet karamellusósu út í búð og sprautaði henni yfir ostakökuna. Það er auðvitað vel hægt að búa til sína eigin karamellusósu eins og ég hef margoft gefið uppskrift að hér á blogginu – til dæmis hér og hér.
Njótið elsku dúllurnar mínar!
Ostakaka með karamellusósu og möndlukurli
Botn:
200 g mulið vanillukex (ekkert krem takk)
40 g smjör
1 tsk instant kaffi
Ostakaka:
500 g mjúkur rjómaostur
300 g sýrður rjómi
150 g sykur
4 egg
1 tsk vanilludropar
1/2 bolli karamellusósa
Möndlukurl:
100 g saxaðar möndlur
50 g sykur
2 msk vatn
Aðferð:
Byrjum á botninum. Hitið ofninn í 150°C og takið til þokkalega stórt eldfast mót eða kökuform. Bræðið smjör og blandið því vel saman við kaffið. Blandið síðan kexinu vel saman við. Þrýstið blöndunni í botninn á forminu.
Svo er það kakan. Blandið öllum hráefnum vel saman, nema karamellusósunni (við notum hana síðar) þar til blandan er létt og ljós. Hellið blöndunni yfir botninn og bakið í 80 mínútur. Slökkvið á ofninum og opnið hann lítillega og leyfið kökunni að kólna inni í ofninum. Sprautið karamellusósunni yfir ostakökuna þegar hún hefur kólnað.
Loks er það möndlukurl. Hitið ofninn í 180°C (þetta er hægt að gera áður en ostakakan er bökuð). Setjið möndlur á bökunarpappírsklædda ofnplötu og ristið í 10 mínútur. Setjið sykur og vatn í pott og hitið yfir meðalhita. Bætið möndlunum út í þegar sykurblandan hefur brúnast lítið eitt og leyfið þessu að malla í 5 mínútur til viðbótar. Skellið möndlunum aftur á bökunarpappírinn og leyfið þeim að kólna. Skreytið ostakökuna síðan með þeim.
You must be logged in to post a comment.