Þetta er ástæðan fyrir því að Kardashian-fjölskyldan er að hætta í sjónvarpi
Spennandi tímar fyrir eina frægustu fjölskyldu heims.


Það kom aðdáendum í opna skjöldu þegar að raunveruleikastjarnan Kim Kardashian West tilkynnti að raunveruleikaþáttur fjölskyldu hennar, Keeping Up With the Kardashians, myndi hætta í framleiðslu á næsta ári, eftir tuttugu þáttaseríur.
Í nýjasta tölublaði Us Weekly er hins vegar haft eftir öruggum heimildarmanni að endalok þáttanna hafi verið lengi í bígerð.
„Dömurnar eru þreyttar á löngum vinnudögum og halda að þær séu nógu frægar án þáttarins til að græða peninga á netinu,“ segir heimildarmaðurinn. Annar bætir við að fjölskyldumeðlmir hafi einnig verið orðnir þreyttir á því að deila einkalífi sínu með almenningi.
„Þau eru bisnessfólk fyrst og fremst og það er mjög augljóst að þau geti grætt miklu meiri pening með minna ómaki með því að kanna önnur viðskiptatækifæri.“
Sá heimildarmaður segir enn fremur að fjölskyldumeðlimir séu nú að kanna mögulega afleidda sjónvarpsþætti (e. spinoff) með framleiðanda Keeping Up With the Kardashian, Ryan Seacrest.
„Fjölskyldan hefur vaxið upp úr þættinum og farið með hann eins langt og mögulegt er.“
Að sögn heimildarmanna Us Weekly eru ýmsar viðræður í gangi, til að mynda heimildarmynd um pólitísk hugðarefni Kim Kardashian og vegferð Kourtney Kardashian er hún stofnaði lífsstílsmiðilinn Poosh.
„Það eru endalausir möguleikar í boði og á hverjum degi skjóta fleiri möguleikar upp kollinum þannig að þetta er virkilega spennandi tími fyrir alla fjölskylduna.“
Nítjánda þáttaröð Keeping Up With the Kardashians fór í loftið vestan hafs í gær, þann 17. september, en tuttugasta serían verður frumsýnd á næsta ári.