Fréttanetið slær í gegn
Takk fyrir frábærar viðtökur!
Skrifað af Lilju Katrínu Gunnarsdóttur þann
Fréttanetið opnaði fyrir rétt rúmri viku, að kvöldi dags þann 3. maí síðastliðinn. Við bjuggumst ekkert við sérstaklega mikilli aðsókn, enda glænýr vefmiðill í frumskógi internetsins. Raunin varð hins vegar önnur.
Við erum himinlifandi með þær viðtökur sem Fréttanetið hefur fengið á þessum nokkru dögum sem það hefur verið í loftinu í núverandi mynd. Strax fyrsta daginn var ljóst að við værum ekki á algjörum villigötum og það væri ekki gjörsamlega galið að setja nýjan vefmiðil í loftið á þessum fordæmalausu tímum. Nokkur þúsund manns fara nú inn á Fréttanetið á degi hverjum, sem er framar okkar björtustu vonum.
Fyrir þetta viljum við þakka ykkur kæru lesendur en um leið minna á að við erum opin fyrir alls kyns ábendingum, varðandi allt milli himins og jarðar, í gegnum netfangið hallo@frettanetid.is.
Það vantar ekki fjölbreytnina hér á Fréttanetinu, en í ljósi þessarar æðislegu fyrstu viku ákváðum við að rifja upp þær fimm fréttir sem vöktu hvað mesta athygli og voru mest lesnar.
Kyssti deyjandi föður á ennið og fyrirgaf honum
Pistill eftir Guðmund Ragnar Einarsson, einn af stofnendum Fréttanetsins, vakti gríðarlega athygli en í pistlinum segir hann frá átakanlegri barnæsku á heimili þar sem báðir foreldrar börðust við Bakkus.
Hræðilegt slys í Eyjum var kveikjan að stuttmynd
Viðtal við Signýju Rós Ólafsdóttur hlaut góðar viðtökur en hún hlaut nýverið verðlaunin Outstanding woman director á kvikmyndahátíðinni Winter Film Awards International Film Festival í New York fyrir stuttmyndina Hafið. Myndin er byggð á sönnum atburðum er fimm ára drengur drukknaði á páskadag.
„Þetta er erfiðasti mæðradagurinn sem ég hef átt“
Kynfræðingurinn Sigga Dögg skrifaði einlægan pistil á sjálfan mæðradaginn sem fjallaði um hennar hugarheim, nýskilin og hve erfitt það er að skipta börnum á milli tveggja foreldra, svo börnin fái jafnan umgengnisrétt við báða foreldra.
Friðrik Ómar lenti í óborganlegu atviki í Hagkaupum
Skemmtifrétt vikunnar var án efa atvikið sem tónlistarmaðurinn Friðrik Ómar Hjörleifsson lenti í í Hagkaupum sem fól í sér afar kostulegt samtal við unga pilta.
Ekkert pláss fyrir hálfvita
Loks var það viðtal við Hildi Eik Ævarsdóttur, sem býr í Bandaríkjunum með unnusta sínum og þremur börnum og rekur vefverslunina Norom. Hildur sagði frá lífinu í Bandaríkjunum, ástandinu sem hefur skapast vegna COVID-19 og góðgerðarstarf, sem hún leggur mikla áherslu á.
